🌧️ પવન, તાપમાન અને વરસાદ અંગે મોટી અપડેટ – અસાઢી બીજની શુભેચ્છાઓ સાથે
સૌપ્રથમ આજે અષાઢી બીજના પાવન અવસરે તમામ કચ્છી ભાઈ-બહેનોને નવા વર્ષની હાર્દિક શુભેચ્છાઓ. સાથે સમગ્ર ગુજરાતવાસીઓને પણ અષાઢી બીજની ખૂબ ખૂબ શુભકામનાઓ.
"કોટે મોર ટહુક્યા, વાદળ ચમકી વીજ... આવી અસાઢી બીજ."
હવે વાત કરીએ ગુજરાતના વરસાદ, પવન અને તાપમાન અંગેની મહત્વપૂર્ણ અપડેટની.
🌦️ વરસાદની સ્થિતિ
છેલ્લા ઘણા દિવસોથી જણાવ્યા મુજબ 15થી 20 જુલાઈ દરમિયાન છૂટાછવાયા હળવાથી મધ્યમ વરસાદી ઝાપટાં પડવાની શક્યતા હતી, જે હવે શરૂ થઈ ગઈ છે. 15 જુલાઈથી રાજ્યના અનેક વિસ્તારોમાં વરસાદી ઝાપટાં નોંધાયા છે અને આજે પણ રાજકોટ, રાપર સહિત ઉત્તર, મધ્ય, દક્ષિણ ગુજરાત અને અન્ય વિસ્તારોમાં વરસાદી માહોલ જોવા મળી રહ્યો છે.
હાલમાં મોન્સૂન ટ્રફ (Monsoon Trough) સક્રિય થઈ છે અને ગુજરાત ઉપર એક અપર એર સાયક્લોનિક સર્ક્યુલેશન (UAC) પણ છે, પરંતુ તે નબળું હોવાથી આગામી થોડા દિવસોમાં માત્ર છૂટાછવાયા હળવાથી મધ્યમ
ઝાપટાં પડવાની સંભાવના છે. કોઈ વ્યાપક ભારે વરસાદની શક્યતા હાલ દેખાતી નથી.
જોકે 25થી 31 જુલાઈ દરમિયાન રાજ્યમાં સારા અને કેટલાક વિસ્તારોમાં ભારેથી અતિભારે વરસાદની શક્યતા યથાવત છે.
🌬️ પવનમાં રાહત
છેલ્લા ઘણા દિવસોથી ગુજરાતમાં 25થી 30 કિમી પ્રતિ કલાક, જ્યારે કેટલાક વિસ્તારોમાં 35 કિમી પ્રતિ કલાક સુધીના પવન ફૂંકાઈ રહ્યા હતા.
હવે 16 જુલાઈથી પવનની ઝડપમાં ઘટાડો શરૂ થયો છે. આગામી 24થી 48 કલાકમાં મોટાભાગના વિસ્તારોમાં પવનની ઝડપ 18થી 20 કિમી પ્રતિ કલાક સુધી આવી જશે. થોડાક વિસ્તારોમાં 22થી 23 કિમી પ્રતિ કલાકનો પવન રહી શકે, પરંતુ રાજ્યના મોટાભાગના ભાગમાં પવન સામાન્ય રહેશે.
🌡️ તાપમાનમાં ઘટાડો
8 જુલાઈ બાદ વરસાદ ઓછો થતાં રાજ્યમાં તાપમાન વધીને 32થી 34 ડિગ્રી સુધી પહોંચ્યું હતું.
હવે વરસાદી પ્રવૃત્તિ વધતા તાપમાનમાં ઘટાડો થશે. આગામી દિવસોમાં રાજ્યનું સરેરાશ મહત્તમ તાપમાન 30 ડિગ્રીથી નીચે રહેવાની શક્યતા છે.
જુલાઈના બાકીના દિવસોમાં મોટાભાગના વિસ્તારોમાં મહત્તમ તાપમાન 26થી 29 ડિગ્રી વચ્ચે રહેવાની સંભાવના છે. દરિયાકાંઠાના વિસ્તારોમાં તેનાથી પણ ઓછું રહી શકે છે.
😊 ગરમી અને ઉકળાટથી મળશે રાહત
મોન્સૂન ધરી ગુજરાત તરફ આગળ વધી રહી હોવાથી વરસાદી ઝાપટાં વધશે અને છેલ્લા કેટલાક દિવસોથી અનુભવાતી ગરમી, ઉકળાટ અને બફારામાં પણ ધીમે ધીમે રાહત મળશે.
આ હતી ગુજરાતના વરસાદ, પવન અને તાપમાન અંગેની મહત્વપૂર્ણ માહિતી.
જો આ માહિતી ઉપયોગી લાગી હોય તો પોસ્ટને લાઈક કરો, શેર કરો અને વધુ હવામાન અપડેટ માટે અમારી સાથે જોડાયેલા રહો.
ટિપ્પણીઓ