ગુજરાતમાં મોટો હવામાન પલટો! ગરમી વચ્ચે વાવાઝોડું અને ભારે વરસાદની આગાહી

 ગુજરાતમાં હવામાનનો મોટો પલટો!

ગરમી, વાવાઝોડું અને પ્રી-મોન્સૂન વરસાદની ડબલ અસરની આગાહી

ગુજરાત સહિત દેશભરમાં વાતાવરણમાં સતત મોટો ફેરફાર જોવા મળી રહ્યો છે. એક તરફ ભયંકર ગરમી લોકોનું જીવન મુશ્કેલ બનાવી રહી છે તો બીજી તરફ અરબી સમુદ્ર અને બંગાળની ખાડીમાં બનેલી સિસ્ટમોને કારણે વાવાઝોડું, આંધી અને પ્રી-મોન્સૂન વરસાદની શક્યતાઓ વધી રહી છે.

હવામાન નિષ્ણાંતો અંબાલાલ પટેલ અને પરેશભાઈ ગોસ્વામીના જણાવ્યા અનુસાર અરબી સમુદ્રમાં બનેલું સાયક્લોનિક સર્ક્યુલેશન ધીમે ધીમે મજબૂત થઈ રહ્યું છે. હાલ સિસ્ટમનો ટ્રફ દરિયાકાંઠા તરફ લાંબો ખેંચાયો હોવાથી દક્ષિણ ગુજરાત અને સૌરાષ્ટ્ર પર તેની વધારે અસર જોવા મળી શકે છે. જો સિસ્ટમ વધુ મજબૂત બને તો ભારે પવન, ગાજવીજ અને તોફાની વરસાદ જેવી સ્થિતિ સર્જાઈ શકે છે. જોકે કેટલીક સંભાવનાઓ મુજબ સિસ્ટમ નબળી પણ પડી શકે છે.

બીજી તરફ ગુજરાતમાં ગરમીનું પ્રમાણ હજુ યથાવત રહેશે. રાજ્યના અનેક વિસ્તારોમાં તાપમાન 44 થી 45 ડિગ્રી સુધી પહોંચવાની શક્યતા વ્યક્ત કરવામાં આવી છે. સવારથી સાંજ સુધી લોકોને ગરમીનો ભારે અનુભવ થઈ શકે છે.

હવામાન નિષ્ણાંતોના જણાવ્યા અનુસાર 18 થી 23 મે દરમિયાન પ્રી-મોન્સૂન એક્ટિવિટીની શરૂઆત થઈ શકે છે. ખાસ કરીને દક્ષિણ ગુજરાત અને સૌરાષ્ટ્રમાં ગાજવીજ સાથે છૂટાછવાયા વરસાદની સંભાવના છે. 20 થી 27 મે દરમિયાન થંડરસ્ટોર્મ એક્ટિવિટી વધુ તીવ્ર બની શકે છે. ભારે પવનને કારણે વૃક્ષો ધરાશાયી થવા, હોર્ડિંગ્સ ઉખડવા અને કાચા મકાનોને નુકસાન થવાની શક્યતાઓ વ્યક્ત કરવામાં આવી છે.

ખેડૂતો માટે પણ આ સમય સાવચેત રહેવાનો છે. મગફળી, મગ, અડદ અને તલ જેવા ઉનાળુ પાકનું હાર્વેસ્ટિંગ સમયસર પૂર્ણ કરવાની સલાહ આપવામાં આવી છે, કારણ કે તોફાની વરસાદથી પાકને નુકસાન પહોંચી શકે છે. આ વરસાદ વાવણીલાયક નહીં પરંતુ પ્રી-મોન્સૂન પ્રકારનો રહેશે.

પરેશભાઈ ગોસ્વામી અનુસાર રાજકોટ, બોટાદ, ભાવનગર, અમરેલી, ગીર સોમનાથ, જૂનાગઢ, પોરબંદર તેમજ દક્ષિણ ગુજરાતના ભરૂચ, સુરત, નવસારી, વલસાડ, વાપી અને ડાંગ જિલ્લામાં તેની અસર વધુ જોવા મળી શકે છે. જ્યારે ઉત્તર અને મધ્ય ગુજરાતમાં સામાન્ય છૂટાછવાયા વરસાદની શક્યતા છે.

આગામી દિવસોમાં ભારે પવન અને ગાજવીજ સાથે વાતાવરણમાં મોટો પલટો આવી શકે છે. લોકોને ખાસ સાવચેત રહેવાની અને હવામાન વિભાગની સૂચનાઓનું પાલન કરવાની સલાહ આપવામાં આવી છે.