ગુજરાતમાં વરસાદની મોટી આગાહી! અરબી સમુદ્રની સિસ્ટમ બની શકે વાવાઝોડું, ચોમાસું વહેલું આવશે?

 નમસ્કાર, વેધર એનાલિસિસ સાથે હું છું…wedhar ઓફ ઇન્ડિયા

 

ગુજરાત સહિત દેશભરમાં ફરી એકવાર હવામાનમાં મોટો બદલાવ જોવા મળી રહ્યો છે. અરબી સમુદ્રમાં બનેલી સિસ્ટમ ધીમે ધીમે મજબૂત બની રહી છે અને આગામી દિવસોમાં તે ડિપ્રેશનથી ડીપ ડિપ્રેશન અને શક્ય છે કે વાવાઝોડાની સ્થિતિ સુધી પહોંચે. તેની અસર દક્ષિણ ભારતના દરિયાકાંઠા વિસ્તારોમાં અત્યારથી જ દેખાવા લાગી છે.

કેરળથી લઈને દક્ષિણના ઘણા વિસ્તારોમાં ભારે વરસાદ અને જોરદાર પવનનો માહોલ સર્જાયો છે. હવામાન નિષ્ણાતોના મતે ચોમાસું આ વખતે કેરળમાં સામાન્ય તારીખ કરતા વહેલું પ્રવેશી શકે છે. જોકે, સિસ્ટમની અસરને કારણે ચોમાસું મહારાષ્ટ્ર આસપાસ થોડા સમય માટે અટકી પણ શકે તેવી સંભાવનાઓ વ્યક્ત કરવામાં આવી રહી છે.

અરબી સમુદ્ર ઉપરાંત બંગાળની ખાડીમાં પણ બીજી એક સિસ્ટમ સક્રિય થઈ રહી છે. બંને તરફથી બનેલી સિસ્ટમો આગામી દિવસોમાં સમગ્ર વાતાવરણને પ્રભાવિત કરશે. માલદીવ્સ નજીક પણ દબાણની સ્થિતિ સર્જાઈ રહી છે, જેના કારણે દરિયાઈ વિસ્તારોમાં હવામાન વધુ અસ્થિર બનતું જાય છે.

હાલમાં દક્ષિણ ભારત અને દરિયાકાંઠાના પટ્ટામાં ભારે વરસાદ પડી રહ્યો છે. 19 થી 21 તારીખ દરમિયાન સિસ્ટમ વધુ મજબૂત થવાની શક્યતા છે. જો હવાના દબાણ અને સમુદ્રી પરિસ્થિતિ અનુકૂળ રહેશે તો આ સિસ્ટમ વાવાઝોડાનું સ્વરૂપ લઈ શકે છે.

ગુજરાત માટે પણ વરસાદી સંકેતો મળી રહ્યા છે. ખાસ કરીને 21 થી 28 તારીખ દરમિયાન રાજ્યના અનેક વિસ્તારોમાં વરસાદની પૂરી સંભાવના વ્યક્ત કરવામાં આવી રહી છે. દક્ષિણ ગુજરાત, ઉત્તર ગુજરાત અને દરિયાકાંઠાના વિસ્તારોમાં સિસ્ટમ આધારિત વરસાદ વધુ અસરકારક રહી શકે છે.

હવામાન વિભાગ અનુસાર આ આખું ચોમાસું “સિસ્ટમ આધારિત” રહી શકે છે. સુપર અલનીનોની અસરને કારણે તાપમાન સામાન્ય કરતા વધુ રહેવાની શક્યતા છે, છતાં અરબી સમુદ્ર અને બંગાળની ખાડીમાં સતત સિસ્ટમો બનતી રહેતાં વરસાદી એક્ટિવિટી ચાલુ રહી શકે છે.

એક તરફ વરસાદી માહોલ બનશે તો બીજી તરફ ગરમીમાં ખાસ રાહત મળવાની નથી. અનેક વિસ્તારોમાં હજુ પણ તાપમાન ખૂબ ઊંચું રહેવાની શક્યતા છે. વરસાદ પછી ભેજ વધતા ઉકળાટનો અનુભવ પણ વધી શકે છે.

હાલ માટે ગુજરાતમાં સૌની નજર હવે આવનારા ચોમાસા અને અરબી સમુદ્રની સિસ્ટમ પર ટકેલી છે. આગામી દિવસોમાં હવામાનમાં મોટા ફેરફાર જોવા મળી શકે છે.