મહારાષ્ટ્રના સ્થાપના દિવસ નિમિત્તે આજે શેરબજાર બંધ રહ્યું હતું, જેના કારણે કોઈ વેપાર થયો નહોતો. હવે બજારનું આગામી સેશન રાબેતા મુજબ સોમવારે યોજાશે. આ દરમિયાન સાંજે સાત વાગ્યે ગિફ્ટી નિફ્ટી ૯૪ પોઈન્ટના વધારા સાથે ૨૪,૨૪૧ની સપાટીએ ટ્રેડ થતો જોવા મળ્યો હતો. શુક્રવારે સવારે ગિફ્ટી નિફ્ટીમાં લગભગ ૨૦૦ પોઈન્ટનો ઉછાળો જોવા મળ્યો હતો અને આ ઈન્ડેક્સ ૨૪,૩૭૬ સુધી પહોંચ્યો હતો. તેની તુલનામાં ગુરુવારે નિફ્ટી ૨૩,૯૯૭ પર બંધ રહ્યો હતો. વૈશ્વિક બજારોમાં ક્રૂડ ઓઈલના ભાવમાં પણ નોંધપાત્ર ઉતાર-ચઢાવ જોવા મળ્યો હતો—ગુરુવારે સવારે ભાવ પ્રતિ બેરલ ૧૨૬ ડોલર સુધી પહોંચ્યા હતા, જે રાત્રિ સુધીમાં ઘટીને ૧૧૪ ડોલર થયા અને શુક્રવારે વધુ ઘટીને સાંજે ૧૧૦ ડોલરની આસપાસ ટ્રેડ થયા હતા. આ તમામ પરિસ્થિતિઓને ધ્યાનમાં લેતાં સોમવારે ભારતીય શેરબજાર વધારા સાથે ખુલે તેવી શક્યતા વ્યક્ત થઈ રહી છે.
શુક્રવારે એશિયન બજારોમાં સકારાત્મક માહોલ જોવા મળ્યો હતો. જાપાનનો નિક્કી ૨૨૫ ઈન્ડેક્સ ૦.૭ ટકા વધ્યો હતો અને યુએસ ડોલર સામે જાપાનીઝ યેન પણ મજબૂત બન્યો હતો. ઓસ્ટ્રેલિયાનો એસ એન્ડ પી એએસએક્સ ૨૦૦ ઈન્ડેક્સ લગભગ ૧ ટકા વધ્યો હતો. બીજી તરફ, ગુરુવારે અમેરિકન બજારોમાં પણ તેજી જોવા મળી હતી—એસ એન્ડ પી ૫૦૦ ઈન્ડેક્સ ૧ ટકા વધીને છેલ્લા પાંચ વર્ષના ઉચ્ચ સ્તરે બંધ રહ્યો હતો. ડાઉ જોન્સ ૧.૬ ટકા વધ્યો હતો, જ્યારે નાસ્ડેક ૦.૯ ટકા વધ્યો હતો. નાસ્ડેકે માસિક ધોરણે છેલ્લા કેટલાક વર્ષોમાં સૌથી મોટો વધારો નોંધાવ્યો હતો.
ટિપ્પણીઓ